Nú gengur sjötti starfsvetur JesúKvenna á Akureyri í garð. Síðastliðinn vetur vorum við þess heiðurs aðnjótandi að sjá ný andlit á stundunum í bland við þau sem við þekktum fyrir. Við erum Guði þakklátar fyrir ykkur allar sem sýnið starfinu áhuga og viljum minna ykkur á að án ykkar myndi starfið ekki blómstra líkt og það gerir. Við erum þakklátar Drottni að hafa fengið að sjá árangur af starfinu og hvetjum ykkur til að leyfa Guði að halda áfram að vinna það verk sem hann hefur hafið.

Sýn okkar fyrir þennan vetur er að miklu leyti sú sama og hún hefur verið. Við þráum að bjóða upp á kennslu sem á við í kringumstæðum nútímakvenna og mun leiða okkur nær Drottni. Líkt og við höfum áður sagt þá er rétt fræðsla og þekking á biblíunni ásamt bæn og samfélagi við Jesú er lykillinn að sterku trúarlífi. Í fyrra hófum við svokallaðar kjarnakennslur sem voru byggðar á bókinni Having a Mary Heart in a Martha World eftir Joanna Weaver. Þessar kennslur voru dreifðar yfir veturinn með það að markmiði að fræðsla Jesúkvenna sé markviss og viðeigandi. Þess á milli voru einstök orð sem Guð hafði lagt viðkomandi prédikara á hjarta. Í vetur verður sama snið á og verða kjarnakennslurnar þrjár og þar með munum við ljúka yfirferð okkar á þessari mögnuðu bók.

Við leggjum mikla áherslu á uppbyggilega fræðslu, lofgjörð og bæn en einnig þykir okkur mikilvægt að JesúKonur á Akureyri munum ná að kynnast enn betur og verða vinkonur sem geta staðið saman í gegnum erfiðleika og glaðst í sameiningu á góðum tímum. Við teljum afar mikilvægt að við getum treyst hver annari og verið til staðar fyrir hver aðra. Því viljum við hvetja ykkur til að borða með okkur eftir stundirnar og nýta tækifærið til að spjalla saman og eiga góða stund áður en haldið er út í daginn.

Stundirnar í vetur verða aftur á fyrsta laugardegi hvers mánaðar klukkan 11:00 með fjórum undantekningum. Fyrsta stund vetrarins verður í formi hópferðar þar sem við munum halda suður á fyrstu stund vetrarins hjá JesúKonum í Reykjavík. Allur laugardagurinn verður tekin frá og hefst klukkan 10:00 á morgunstund og endar á samkomu um kvöldið. Þeir sem hafa áhuga á að koma með er bennt á að hafa samband við okkur á facebook eða akureyri@jesukonur.is. Desemberstundin verður í ár á föstudagskvöldi, nánar tiltekið 2. desember klukkan 20:00. Sú stund verður enn fremur haldin í heimahúsi þar sem við biðjum allar sem geta að mæta með kræsingar á veisluborðið og litla gjöf að verðmæti 1.000 krónur. Aprílstundin verður síðan annan laugardag þess mánaðar, þann 14., vegna páska.

Líkt og áður stefnum við á að fara í bústað síðustu stund vetrarins. Ferðin verður 5. – 6. maí og verður auglýst nánar þegar nær dregur.

Við biðjum ykkur að geyma póstkortið þar sem þið sjáið það til að minna ykkur á stundirnar í vetur. Að lokum viljum við biðja ykkur um að hafa yfirskrift Jesúkvenna á Íslandi í huga í dagsins amstri.

Konurnar sem sigur boða eru mikill her. (Sálm 68:12)

Með kærleik og mikilli tilhlökkun

Jóhanna Sólrún, Salmína, Sandra Rebekka og Vallý